३ बैशाख २०७८, शुक्रबार |


निर्वाचन “कसुर तथा सजाय विधेयक” पारित


एभरेष्टवीक
१७ माघ २०७३, सोमबार ११:०९

काठमाडौँ, १७ माघ । व्यवस्थापिका–संसद्को आजको दोस्रो बैठकले ‘निर्वाचन कसुर तथा सजाय विधेयक, २०७३ लाई पारित गरेको छ ।
उपप्रधानमन्त्री एवम् गृहमन्त्री विमलेन्द्र निधिले स्थानीय तहको निर्वाचनका सम्बन्धमा आवश्यक पर्ने उक्त विधेयक सदनमा प्रस्तुत गरेका थिए। त्यसअघि राज्य व्यवस्था समितिको प्रतिवेदनसहितको निर्वाचन कसुर तथा सजाय विधेयक, २०७३ माथि छलफल गरियोस् भनी प्रस्ताव प्रस्तुत गरेको थियो ।
यसअघि सांसद प्रेम सुवालले निर्वाचनमा गम्भीर कसुर गर्ने, भोजभतेर गर्ने, जागिर दिने आश्वासन दिने, मोबाइल तथा भौतिक सामग्री वितरण गर्ने, मतदान केन्द्र तोडफोड गर्ने दल र उम्मेदवार एवम् कर्मचारीलाई कडा कारबाही गर्ने व्यवस्था गर्नुपर्ने धारणा राखे।
सांसद सुवालले उठाएको विषयको जवाफ दिंदै उपप्रधानमन्त्री एवम् गृहमन्त्री निधिले गैरकानुनी काम गर्ने राजनीतिक दल, उम्मेदवार तथा कर्मचारीलाई दण्डित गरिने विश्वास दिलाए।
राज्य व्यवस्था समितिले दिएको सुझाव तथा परिमार्जनलाई अक्षरशः विधेयकमा समावेश गरिएको, गैरकानुनी कार्य नियन्त्रण गर्न प्रस्ट रुपमा व्यवस्था गरिएको बताए । व्यवस्थापिका–संसद्को अर्को बैठक यही माघ १९ गते बुधबार १५ बजे बस्नेछ ।

प्रतिक्रिया दिनुहोस्