३१ बैशाख २०७८, शुक्रबार |


धौभडेलको ‘वन्ली यु’ विमोचित


एभरेष्टवीक
११ असार २०७४, आईतवार ०६:३१

नगरकोट, ११ असार । चौध वर्षको नियमित साधनापछि गायक रोशन धौभडेलको पहिलो एकल गीति एल्बम ‘वन्ली यु’ (मात्र तिमी)सार्वजनिक भएको छ ।

गायक दीप श्रेष्ठ, दीपक जङ्गम र दीपक खरेलले शनिबार एल्बम विमोचन गर्नुभएको हो । एल्बममा भएका आठ गीतमध्ये सात वटामा धौभडेलले आफैँले र एउटामा सुनिल मोक्तानसँगको सहकार्यमा सङ्गीत भर्नुभएको छ । एल्बममा ध्रुव मधिकर्मी, भक्तपुर तलेजुका मूल नाइके नरेन्द्रप्रसाद जोशी, मगनबाबु श्रेष्ठ, उज्ज्वलकुमार बस्नेत, शिवप्रसाद मुनंकर्मी, तुलसी घेमोसुसँगै गायक धौभडेलका शब्द छन् ।
एल्बम विमोचनमा गायकहरुले धौभडेलको स्वर बहुआयामिक रहेको बताउँदै उहाँको आफ्नै मिठासपूर्ण स्वर भएकाले जुनसुकै गीत गाउने क्षमता राख्ने जिकिर गर्नुभयो । गीतकार मधिकर्मीले गीत र सङ्गीतका क्षेत्रमा भक्तपुरमा प्रतिभावान् व्यक्तित्व भए पनि प्रचारमा आउन नसकेको गुनासो गर्नुभयो ।
गायक धौभडेलले आफू गायक किशोरकुमारबाट धेरै प्रेरित भएको जानकारी दिँदै करिब तीन वर्षको प्रयासबाट एल्बम निकाल्न सफल भएको बताउनुभयो ।
एल्बम बिक्रीबाट प्राप्त रकम भक्तपुर नगरपालिका– ७ स्थित सिद्धिशालिग्राम आदर निकेतनलाई सहयोग गरिने बताइएको छ । एल्बम लिब्जु फिल्मस् प्रालिले बजारमा ल्याएको हो । रासस

प्रतिक्रिया दिनुहोस्